విజయవాడలో రెచ్చిపోతున్న ప్రేమోన్మాదులు..ఈరోజు మరో యువతి మృతి!

వాస్తవం ప్రతినిధి: విజయవాడలో ప్రేమోన్మాదులు రెచ్చిపోతున్నారు. తమ ప్రేమను నిరాకరించిందన్న ఆక్రోశం అక్కసుతో ప్రాణాలు తీసేందుకు కూడా లెక్కచేయటం లేదు. మొన్న ప్రేమ వేధింపులకు బలైన చిన్నారి అనే యువతి ఘటన మరువకముందే ఇవాళ మరో యువతి కూడా ప్రేమోన్మాది చేతిలో ప్రాణాలు కోల్పోయింది. విజయవాడకు చెందిన ఓ ఇంజినీరింగ్‌ విద్యార్థినిని కొద్ది కాలంగా నాగేంద్ర బాబు అనే యువకుడు ప్రేమ పేరుతో వేధిస్తున్నాడు. అయితే తన ప్రేమను దివ్య అంగీకరించకపోవటంతో ఆక్రోశంతో ఊగిపోయిన నాగేంద్ర బాబు నేరుగా ఇంటికి వెళ్లి కత్తితో దాడికి పాల్పడ్డాడు. మెడపై తీవ్రంగా గాయపరిచాడు. ప్రాణాలతో కొట్టుమిట్టాడిన యువతి చికిత్స పొందుతూ మృతి చెందింది.

ఇటీవల విజయవాడలో ఇలాంటి ఘటనే చోటుచేసుకుంది. కొవిడ్ కేర్ సెంటర్‌‌లో నర్సుగా పనిచేస్తోన్న చిన్నారి అనే యువతిని ఓ యువకుడు ప్రేమ పేరుతో వెంటపడ్డాడు. పోలీసులకు ఫిర్యాదు చేస్తే బుద్ధి మార్చుకుంటానని చెప్పి తర్వాత ఆ యువతిపై కిరోసిన్ పోసి సజీవదహనం చేశాడు.