కలిసి పనిచేద్దాం.. జగన్‌తో కీలక అంశాలపై కేసీఆర్ చర్చ

వాస్తవం ప్రతినిధి: ఇరుగు పొరుగు రాష్ట్రాలతో ఇచ్చిపుచ్చుకునే ధోరణితో వ్యవహరించడమే తమ విధానమని, ఆంధ్రప్రదేశ్ రాష్ట్రంతోనూ అదే విధానం అవలంభిస్తామని తెలంగాణ ముఖ్యమంత్రి కల్వకుంట్ల చంద్రశేఖర్ రావు స్పష్టం చేశారు. గోదావరి, కృష్ణా నదీ జలాలను సమర్థంగా వినియోగించుకుంటే రెండు రాష్ట్రాలు సుభిక్షంగా ఉంటాయని అభిప్రాయపడ్డారు. ఏపీ ఎన్నికల్లో ఘన విజయం సాధించి, వైఎస్సార్‌సీపీ ఎల్.పి. నేతగా ఎన్నికైన వైఎస్ జగన్మోహన్ రెడ్డి సతీ సమేతంగా శనివారం (మే 25) సాయంత్రం ప్రగతి భవన్‌లో సీఎం కేసీఆర్‌ను మర్యాదపూర్వకంగా కలిశారు. ఈ సందర్భంగా ఇరువురు నాయకులు వివిధ అంశాలపై చర్చించారు.

ఏపీతో మంచి సంబంధాలు నెలకొల్పుతామని సీఎం కేసీఆర్ స్నేహహస్తం అందించారు. ‘గోదావరి నది నుంచి ఏటా 3,500 టీఎంసీల నీరు సముద్రంలో కలుస్తోంది. తెలంగాణ రాష్ట్రం గరిష్టంగా 700-800 టీఎంసీలను మాత్రమే వాడుకోగలదు. మిగతా నీరంతా ఏపీ వాడుకునే వీలుంది. ప్రకాశం బ్యారేజి ద్వారా సోమశిల వరకు గ్రావిటీ ద్వారానే గోదావరి నీటిని పంపించవచ్చు. దీంతో రాయలసీమను సస్యశ్యామలం చేయవచ్చు’ అని జగన్‌కు సీఎం కేసీఆర్ చెప్పారు.

కేవలం రెండు లిఫ్టులతోనే గోదావరి నీళ్లను రాయలసీమకు తరలించవచ్చని.. రైతులకు సాగునీరు ఇవ్వవచ్చని జగన్‌తో కేసీఆర్ అన్నారు. త్వరలోనే రెండు రాష్ట్రాలకు చెందిన అధికారులతో సమావేశమై అన్ని అంశాలపై చర్చించుకోవాలని ఇరువురు నేతలు నిర్ణయించారు.

‘ఇరుగు పొరుగు రాష్ట్రాలు ఇచ్చిపుచ్చుకునే ధోరణితో వ్యవహరించడం మంచిదని మేము మొదటి నుంచి భావిస్తున్నాం. నేను స్వయంగా మహారాష్ట్రకు వెళ్లి అక్కడి ముఖ్యమంత్రి దేవేంద్ర ఫడ్నవీస్‌ను కలిశాను. దశాబ్దాలుగా ఆంధ్రప్రదేశ్ – మహారాష్ట్ర మధ్య ఉన్న జల వివాదాల కారణంగా ప్రాజెక్టుల నిర్మాణం ఆగిపోవడంపై నేనే చొరవ తీసుకుని మాట్లాడాను’ అని జగన్‌తో సీఎం కేసీఆర్ అన్నారు.

లివ్ అండ్ లెట్ లివ్ తమ విధానమని మహారాష్ట్ర సీఎంకు చెప్పానని.. వివాదాలు పరిష్కరించుకోవడం వల్ల రెండు రాష్ట్రాలకు మేలని వివరించానని జగన్‌తో కేసీఆర్ చెప్పారు. దీంతో సహకరించడానికి మహారాష్ట్ర ముందుకొచ్చినట్లు తెలిపారు. ఫలితంగా కాళేశ్వరం, ఇతర ప్రాజెక్టులు నిర్మించుకోగలుగుతున్నామని చెప్పారు. ఏపీతోనూ ఇలాంటి సంబంధాలనే కొనసాగించాలన్నది తమ విధానమని.. రెండు రాష్ట్రాలకు మేలు జరిగేలా వ్యవహరిద్దామని కేసీఆర్ అన్నారు.

జగన్‌కు ఆత్మీయ స్వాగతం
వైఎస్ జగన్ ప్రగతి భవన్ వచ్చిన సందర్భంగా సీఎం కేసీఆర్ ఘన స్వాగతం పలికారు. జగన్‌ను ఆలింగనం చేసుకొని అభినందించారు. పోచంపల్లి ఇక్కత్ శాలువా కప్పి సన్మానించారు. కరీంనగర్ పిలిగ్రీ జ్ఞాపిక బహుకరించారు. సీఎం బాధ్యతల్లో విజయవంతం కావాలని జగన్‌ను దీవించారు. స్వీటు తినిపించి సంతోషం పంచుకున్నారు.

సీఎం కేసీఆర్.. రాష్ట్ర మంత్రులను, ఇతర ప్రముఖులను జగన్‌కు పరిచయం చేశారు. జగన్ సతీమణి భారతికి పోచంపల్లి చీర బహూకరించారు. కేసీఆర్ సతీమణి శోభారాణి, కేటీఆర్ సతీమణి శైలిమ ఆమెకు స్వాగతం పలికారు

జగన్ వెంట ఎంపీలు విజయసాయి రెడ్డి, మిథున్ రెడ్డి ఉన్నారు. కేసీఆర్‌తో పాటు జగన్‌కు స్వాగతం పలికిన వారిలో స్పీకర్ పోచారం శ్రీనివాస్ రెడ్డి, డిప్యూటీ స్పీకర్ పద్మారావు, మంత్రులు మహమూద్ అలీ, ఈటెల రాజేందర్, ఇంద్రకరణ్ రెడ్డి, కొప్పుల ఈశ్వర్, జగదీశ్ రెడ్డి, వేముల ప్రశాంత్ రెడ్డి, తలసాని శ్రీనివాస్ యాదవ్, వి.శ్రీనివాస్ గౌడ్, మల్లారెడ్డి, ప్రభుత్వ విప్ పల్లా రాజేశ్వర్ రెడ్డి, పార్లమెంటరీ పార్టీ నేత కేశవరావు, టీఆర్‌ఎస్ వర్కింగ్ ప్రెసిడెంట్ కేటీ రామారావు తదితరులు ఉన్నారు.